د. جمال شعبان رئيس معهد القلب الأسبق كتب على صفحته الخاصة بموقع التواصل الاجتماعى الفيس بوك عددا من النصائح لكى نعيش سعداء.. وجاءت كالتالى:
١- اشتغل جامد عشان تكون نفسك
وتبني كاريرك وتثبت ذاتك
٢-مش لازم تخلي كل حاجة قريبة للبيت
الانتقال في الشوارع
وقراءة وجوه الناس
وواجهات بيوت مصر
متعة في حد ذاتها
ومش تضييع للعمر
٣- اتفرج علي التلفزيون
بس حاجات محددة
ماتشات الكورة مسلسلات قديمة ماسبيرو زمان
ابعد عن القنوات الاخبارية وبرامج التوك شو
علشان تحافظ علي قلبك
وقواك العقلية
٤- أي حد يكلمك عن مشاكل ونكد وطاقة سلبية…
رد عليه بابتسامة كبيرة
وقل له (ربك كبير ) “إن شاء الله خير”
٥- لما تحب ترغي في وقت الفراغ
لازم تقعد بس مع الناس الإيجابية وتبتعد عن الناس الشكاية البكاية.
٦- اشكر ربنا علي اللي عندك
اوعي تستهتر او تستقل باللي عندك عشان غيرك معندوش
ولئن شكرتم لأزيدنكم
وساعد الناس علشان تسعد
ساعد تسعد
٧- العب رياضة
علي الأقل تمشي كل يوم ٤٥ دقيقة عشان تفرغ الطاقة السلبية وعشان تاكل …
الأكل في مصر حلو اوي
بس حاول تعمل كونترول
علشان كولسترولك وقلبك
٨- اعمل دماغ بالقهوة او الشاي او الشيكولاتة بس بحساب
دول مفيدين لقلبك ودماغك
٩ – سافر كتير غير جو
لازم تبعد يوم او يومين كل أسبوع عن المدن الخانقة
الي السواحل او الأرياف او الأماكن المفتوحة
واعتبر مصاريف السفر دي وقاية من الامراض
والوقاية خير من العلاج .
١٠ – لما تروح أماكن سياحية في مصر
هتعرف قد ايه مصر جميلة
خليك فاكر مصر جميلة اوي ومنورة بأهلها .
